„Álfur“ í vímu vopnaður sverði réðst á bíl

Maður í LSD-vímu klæddi sig upp sem persóna í sögu JRR Tolkien og réðst á bíl vopnaður sverði í Portland í síðustu viku.

Já, maðurinn hélt að hann væri álfur að berjast gegn Morgoth, sem er uppspretta alls hins illa í undanfara Hringadróttinssögu sem ber titilinn Silmerillinn. Í söguheimi Tolkien er Morgoth einskonar yfirmaður Sauron, sem berst öllu hinu góða í Hringadróttinssögu. Maðurinn hélt að BMW-bifreið saklausrar konu frá norð-austurhluta Portlandborgar væri uppspretta alls ills í heiminum.

Konan sem varð fyrir þessari sérkennilegu árás var stödd á gatnamótum í miðborginni þegar maðurinn, klæddur sem álfur í baráttuham réðst á bíl hennar. Hann stakk bílinn með sverði, sprengdi dekkin og gerði göt á bretti og hurðar.

Konan hringdi samstundis í lögregluna og tilkynnti henni að sjóræningi hefði ráðist á bílinn sinn.

Lögreglan var kölluð á vettvang og yfirbugaði manninn. Fáar myndir náðust af atvikinu, en hér til vinstri má sjá manninn enn með hjálminn sem hann ætlaði að nota til að verja sig frá árásum Morgoth.

Bandarískir fjölmiðlar hafa nafngreint manninn sem var þarna að verki. Hann heitir Konrad Bass. Hann viðurkenndi að hafa tekið inn LSD og hreinlega gengið af göflunum. Hann hefur verið kærður fyrir atvikið en var sendur á spítala í Portland til rannsókna og til þess að láta renna af sér.

Ekki er vitað hvort konan hafi verið tryggð fyrir árás álfs.