Símhringingar og hótanir á talhólf

Önnur kvennanna tveggja sem Gunnar Þorsteinsson í Krossinum hefur stefnt fyrir meiðyrði vegna umfjöllunar Vefpressunnar um kynferðisbrot segist aldrei hafa ætlað sér að fara með málið í fjölmiðla. Mbl greinir frá þessu.

Ásta Knútsdóttir, ein þeirra stefndu, sagði fyrir dómi í dag að ástæða þess að málið rataði í fjölmiðla hafi verið viðtal við Jónínu Benediktsdóttur, eiginkonu Gunnars, sem birtist í Fréttatímanum í tengslum við ævisögu hennar. Þar sagðist Jónína óttast að skítaherferð færi í gang gegn Gunnari. „Ég veit hvernig þessir menn vinna og í ljósi þess hver á Birting þá kæmi mér ekki á óvart að einhver birtist á forsíðu Vikunnar og sakaði Gunnar um að hafa brotið á sér,“ sagði Jónína í viðtalinu við Fréttatímann á sínum tíma.

Ásta sagði þetta hafa vakið reiði meðal kvennanna en þær höfðu fram að þessu aðeins ætlað að deila reynslu sinni innan hópsins og sækja þannig styrk. Þær hafi þess vegna ákveðið að fara með málið fyrir stjórn Krossins og síðan í fjölmiðla.

Þór Jónssyni, blaðamanni Pressunnar, var síðan afhent bréf frá konunum en Pressan greindi frá málinu þann 25. nóvember 2010.

Ásta sagði mjög hraða atburðarás hafa farið í gang þar sem fjölmiðlar hringdu stöðugt í konurnar sem voru hræddar vegna áreitis frá Gunnari og fjölskyldu hans, en þetta áreiti ýtti á konurnar með að fara með málið í fjölmiðla. „Þetta voru símhringingar og hótanir inn á talhólf,“ hefur Mbl eftir Ástu frá aðalmeðferðinni í dag.

Hún sagði Jónínu einnig hafa hringt en konurnar hefðu ekki þorað út úr húsi né að vera einar heima. „Það var eina leiðin til að stoppa þessar ofsóknir,“ sagði Ásta.

Ásta sagðist hafa viljað taka á sig skellinn sem hinar konurnar treystu sér ekki til að taka. Tilgangurinn hafi verið að opinbera mann sem til margra ára hafði beitt kynferðisofbeldi og áreiti gegn konum og ungum stúlkum og til að koma í veg fyrir að fleiri konur yrðu honum að bráð.