Í mál vegna myndar um kynlífsfíkil

Svo virðist sem einhverjir eftirmálar verði af gerð kvikmyndarinnar Welcome to New York, sem frumsýnd var á kvikmyndahátíðinni í Cannes á dögunum.

Myndin fjallar um mann sem þjáist af kynlífsfíkn og reynir meðal annars að svala fýsnum sínum með herbergisþernu á hóteli.

Fyrrverandi framkvæmdastjóri Alþjóðagjaldeyrissjóðsins, Dominique Strauss-Kahn, hefur nú höfðað mál gegn leikstjóra og framleiðendum kvikmyndarinnar vegna líkinda í söguþræðinum við hans eigið líf.

Strauss-Kahn sagði upp störfum fyrir þremur árum, eins og kunnugt er, þegar starfskona á hóteli kærði hann fyrir nauðgun. Sættir náðust þó í málinu áður en það fór fyrir dóm.

Leikstjórinn, Abel Ferrara, gefur þó lítið fyrir ákæruna.

„Hér ríkir tjáningarfrelsi og ég er listamaður," sagði leikstjórinn. „Þetta er ekki heimildarmynd."