Shaqiri íhugar að fara frá Bayern

Svisslendingurinn Xherdan Shaqiri ætlar ekki að vera áfram hjá Bayern nema hann fái meira að spila en á nýliðnu tímabili.

„Það er ljóst að ég get ekki haldið áfram ef ekkert breytist. Þá verð ég að breyta einhverju sjálfur,“ sagði hann í samtali við svissneska fjölmiðla.

„Ég vil spila í mikilvægum leikjum og ekki bara í þýsku úrvalsdeildinni. Ég vil ekki upplifa annað svona ár.“

Hann kom aðeins við sögu í tíu leikjum í þýsku úrvalsdeildinni í vetur og hefur gefið til kynna að hann vilji mögulega flytja til Englands.

„Ég vil spila fyrir stórt félag. Meistaradeildin er mér mikilvæg en við skulum sjá hvað gerist. Ef ég fer frá Bayern þá fer ég frá Þýskalandi. England væri möguleiki en ég yrði að fara til liðs sem væri að berjast um titilinn.“

Shaqiri er samningsbundinn Bayern til 2016 og hefur áður verið orðaður við Liverpool.