Telja áhorf á klám til heilsufarsvandamála

Útbreiðsla kláms er svo mikil í Bandaríkjum að rétt væri að flokka það sem heilsufarsvandamál. Þessu halda samtök aðgerðasinna sem kalla sig Morality in Media fram.

Hópurinn telur að taka eigi á klámnotkun á sama máta og tekið er á ölvunarakstri og reykingum unglinga.

„Margar nýlegar rannsóknir benda til þess að klám sé skaðlegt,“ segir Dawn Hawkins hjá samtökunum og segir hún næstum allar fjölskyldur í Bandaríkjunum hafa hlotið skaða af völdum kláms.

Í dag hófst ráðstefnan The Coalition to End Sexual Exploitation í Washington þar sem rætt verður um vandann. Ráðstefnuna sækja heilbrigðisstarfsmenn, félagsráðgjafar, femínistar, trúarleiðtogar og fyrrverandi starfsmenn klámiðnaðarins.

„Rannsóknir sýna að meðalaldur þeirra sem sjá klám í fyrsta sinn er á bilinu ellefu til fjórtán ára,“ segir Gail Dines, félagsfræðiprófessor í Boston, og bætir hún því við að klám í dag sé allt annað en það var áður.

„Þessar niðrandi og kvenfjandsamlegu myndir svipta ungmenni þeirri heilbrigðu kynhvöt sem allir eiga rétt á.“

Þá segir Mary Anne Layden hjá Pennsylvaníuháskóla að klám hafi komið við sögu í öllum þeim kynferðisbrotamálum sem hún hafi haft til meðferðar sem sálfræðingur.

„Því fyrr á ævinni sem karlmenn kynnast klámi, þeim mun líklegri eru þeir til að brjóta gegn einhverjum kynferðislega.“