Bandaríkin kæra Kínverja fyrir netnjósnir

Bandarísk yfirvöld hafa kært fimm yfirmenn úr kínverska hernum fyrir að hakka sig inn í tölvukerfi bandarískra einkafyrirtækja. Þetta er fyrsta dómsmálið af sinni gerð.

Eric Holder, dómsmálaráðherra Bandaríkjanna, segir að útlit sé fyrir að netnjósnirnar hafi ekki verið framkvæmdar af neinni annarri ástæðu en til þess að bæta samkeppnisstöðu ríkisrekna fyrirtækja í Kína á kostnað þeirra bandarísku.

Hann segir að fyrirtækin sem njósnað var um séu þau Westinghouse Electric, US Steel, Alcoa, Allegheny Technologies, Solar World og Verkalýðsfélag bandarískra stálverkamanna.

Kínversk yfirvöld þverneita ásökununum og segjast sjálf þurfa að þola iðnaðarnjósnir af svipuðu tagi. Kínverjarnir fimm sem kærðir eru heita Wang Dong, Sun Kailiang, Wen Xinyu, Huang Zhenyu og Gu Chunchui. Allir eru þeir yfirmenn í Frelsisher Kína. Það er fréttastofa BBC sem greindi frá málinu fyrir stuttu.