Á þriðja hundrað sóttu um stöðu yfirmanns hjá RÚV

Á þriðja hundrað manns sóttu um yfirmannsstöður hjá RÚV en umsóknarfrestur rann út á miðnætti á fimmtudag. Sigrún Hermannsdóttir, fulltrúi útvarpsstjóra, sagði í samtali við Vísi að verið væri að flokka umsóknir sem stendur.

„Þetta á að ganga eins hratt fyrir sig og mögulega er hægt. Það er beðið eftir þessu fólki hérna inni,“ segir Sigrún um hvenær reiknað sé með að nýir yfirmenn taki til starfa. Ómögulegt væri að ná í Magnús Geir Þórðarson, nýráðinn útvarpsstjóra, enda væri hann á kafi að fara í gegnum umsóknirnar. Nöfn umsækjenda verði birt í hádeginu á mánudag.

Í flestum tilfellum gegna þeir yfirmenn sem sagt var upp störfum um miðjan mars enn sínum stöðum. Í undantekningatilfellum hafi verið samið um annað.

Sigrún segir ekki liggja fyrir hversu margir hafi sótt um hverja og eina yfirmannsstöðu. Þá hefði fólk haft til tólf á hádegi í dag, föstudag, til þess að draga umsóknina til baka vildi það ekki að nafn sitt yrði birt.

Stöðurnar níu sem lausar voru til umsóknar þar til á miðvikudag eru eftirfarandi:

Framkvæmdastjóri rekstrar-, fjármála- og tæknisviðs

Framkvæmdastjóri samskipta-, þróunar- og mannauðssviðs

Skrifstofustjóri

Mannauðsstjóri

Dagskrárstjóri Rásar 1

Dagskrárstjóri Rásar 2

Dagskrárstjóri Sjónvarps

Fréttastjóri

Vef- og nýmiðlastjóri