Fyrirliði fyrsta heimsmeistaraliðs Brasilíu lést í gær

Hilderaldo Bellini var fyrirliði Brasilíumanna á HM í Svíþjóð 1958 þegar brasilíska þjóðin eignaðist sína fyrstu heimsmeistara í fótbolta. Bellini fékk ekki að upplifa HM í sínu eigin landi í sumar því hann lést í gær 83 ára gamall.

Hilderaldo Bellini lést á sjúkrahúsi í São Paulo en hann var búinn að vera með Alzheimer-veiki í mörg ár. Bellini fékk hjartaáfall fyrir þremur árum síðan og gat ekki talað eftir það.

Bellini verður jarðaður í heimabæ sínum Itapira á föstudaginn. „Brasilískur fótbolti og aðdáendur hans upplifa nú mikla sorg eftir að við misstum frábæran fyrirliða. Ég fékk tækifæri til að kynnast honum þegar hann spilaði með São Paulo. Hann var frábær varnarmaður, heiðursmaður og mikill fagmaður," sagði Jose Maria Marin, forseti brasilíska knattspyrnusambandsins.

Hilderaldo Bellini var ekki aðeins fyrsti fyrirliði heimsmeistaraliðs Brasilíu því hann var einnig fyrsti fyrirliði heimsmeistara sem lyfti bikarnum hátt á loft eftir að hafa tekið við hinum. Síðan þá hefur það verið venjan þegar fyrirliðar taka við bikurum.

Fyrir utan Maracana-leikvanginn er stytta af Hilderaldo Bellini með HM-bikarinn hátt á lofti eftir sigurinn í Stokkhólmi árið 1958.

Hilderaldo Bellini varð einnig heimsmeistari með Brasilíu árið 1962 en var þá ekki í liðinu í úrslitaleiknum og Mauro Ramos tók við heimsbikarnum. Hann var einnig í HM-hópi Brasilíumanna á HM í Englandi 1966.