Alfreð með sitt tuttugasta mark á tímabilinu

Alfreð Finnbogason skoraði eitt marka Heerenveen í 3-0 sigri á ADO Den Haag í hollensku úrvalsdeildinni í fótbolta í kvöld.

Þetta var fyrsti sigur Heerenveen-liðsins á árinu 2014 en liðið fékk bara eitt stig út úr tveimur fyrstu leikjum sínum.

Kenneth Otigba skoraði fyrra mark Heerenveen á 58. mínútu en Alfreð bætti við öðru marki úr vítaspyrnu tíu mínútum síðar. Rajiv van La Parra skoraði þriðja markið í uppbótartíma leiksins.

Heerenveen er og verður áfram í 5. sæti deildarinnar nú fjórum stigum á eftir liði Feyenoord.

Alfreð, sem er markahæsti maður hollensku úrvalsdeildarinnar, er nú búinn að skora 20 mörk í 18 deildarleikjum á leiktíðinni en hann var þarna að skora í fimmta deildarleiknum í röð.