Leikur í spænska bikarnum flautaður af eftir mínútu

Leikmenn C-deildarliðs Racing Santander notuðu bikarleik á móti Real Sociedad í kvöld til þess að mótmæla því að þeir hafa ekki fengið borguð laun í marga mánuði.

Real Sociedad vann fyrri leikinn 3-1 en seinni leikurinn átti að fara fram í kvöld og í boði var undanúrslitaleikur á móti stórliði Barcelona.

Leikmenn Racing Santander neituðu að spila leikinn og stóðu bara við miðlínuna eftir að dómari leiksins flautaði leikinn á. Angel Lavin, forseti félagsins og stjórn hans, neituðu að segja af sér og því sáu leikmennirnir sig tilneydda til að fara í verkfall.

Leikmenn Real Sociedad spörkuðu boltanum aðeins á milli sín en spöruðu honum síðan upp í stúku. Áhorfendur stóðu með leikmönnum Racing Santander og kölluðu: "Ekki spila, ekki spila."

„Við gerðum þetta í kvöld af því að við berum virðingu fyrir fótboltanum, íþróttinni sem við elskum. Þetta var mikilvægasti leikurinn í okkar lífi en heiður okkar og sæmd vó þyngra," sagði Paco Fernandez, þjálfari Racing Santander.

Racing Santander á yfir höfði sér sekt og jafnvel bann frá keppni í spænska bikarnum á næstu leiktíð. Þess má geta að ókeypis var á leikinn og félagið þurfti því ekki að endurgreiða miðanna.