Farsímar helstu skotmörk drónaárása

Her og leyniþjónusta Bandaríkjanna notast við upplýsingar um staðsetningu farsíma, fengnar úr fórum Þjóðaröryggisstofnunarinnar (NSA), þegar teknar eru ákvarðanir um drónaárásir á einstaklinga í Pakistan og víðar um heim.

Þetta kemur fram í grein eftir bandarísku blaðamennina Jeremy Scahill og Glenn Greenwald á splunkunýrri fréttasíðu þeirra, The Intercepter, sem framan af verður einkum notuð til að koma á framfæri upplýsingum úr leyniskjölum úr fórum uppljóstrarans Edwards Snowden.

Fullyrt er að sjaldnast sé leitað staðfestingar á því að einstaklingar, sem ákveðið hefur verið að drepa, séu í raun staddir á staðnum sem árás er gerð á. Þess í stað er látið nægja að SIM-kort úr farsíma, sem talið er að viðkomandi hafi notað, hafi verið staðsett.

Vandinn er sá að hinir herskáu menn, sem Bandaríkin eru á höttunum eftir, eru ekki alltaf með símann sinn á sér. Sumir hafa kannski lánað vinum sínum eða ættingjum símann, en aðrir skiptast reglulega á SIM-kortum gagngert til þess að villa um fyrir Bandaríkjamönnum.

Miklar líkur eru því til þess að ein hverjir allt aðrir einstaklingar verði fyrir árásum, auk þess sem sjaldnast hefur verið reynt að ganga úr skugga um að saklausir einstaklingar séu ekki líka á staðnum þegar árás er gerð.

Þeir Scahill og Greenwald hafa þetta bæði eftir fyrrverandi sérsveitarmanni, sem hefur reynslu af því að stjórna drónaárásum, og úr leyniskjölum frá NSA sem Snowden hafði afritað og lekið til blaðamanna.