Kuldakastið í Bandaríkjunum: "Andlitið hreinlega frýs á manni"

16 dauðsföll eru þegar rakin til óveðursins sem nú gengur yfir Bandaríkin. Veðurspár gera ráð fyrir versta veðrinu í fylkjum norðaustan til og lýst hefur verið yfir neyðarástandi í Boston, New York og New Jersey.

Kolbrún Kristjánsdóttir Fass býr í Chicago og þar segir hún búist við um 50 stiga frosti vegna vindkælingar. Skóla sem hún vinnur í hefur aðeins verið lokað í einn dag á undanförnum 23 árum en hann var lokaður í dag. Allir grunnskólar á svæðinu eru líka lokaðir. „Skólunum er stundum haldið opnum af því að mikið af þessum börnum er úr fátækum hverfum og þau fá að borða í skólunum svo þeir halda þeim opnum eins mikið og þeir geta. Samt var tilkynnt í gærkvöldi að skólarnir yrðu lokaðir,“ segir Kolbrún.

Hún segir fólk beðið að keyra ekki nema það sé lífsnauðsynlegt þar sem fólk geti látist vegna kulda á örskömmum tíma, til dæmis ef bílar bili. Hún segir mikið um útigangsmenn í borginni. „Maður auðvitað vonast til að hafa rangt fyrir sér en ég get ekki ímyndað mér annað en að það verði einhver dauðsföll út af þessum kulda,“ segir hún.

Hún segir fólk óttaslegið og byrjað að hamstra mat. „Fólk er að birgja sig upp af mat og í mörgum búðum er örtröð og læti því fólk er að reyna að útvega sér vistir.“

Jóhann Friðriksson býr einnig í Chicago og hann þurfti að beita logsuðutæki á frosna lása til að komast af heimili sínu í dag. „Fólk er bara beðið að fara ekki út nema í brýnustu nauðsyn. Dóttir konunnar minnar vill ekki fara út með barnið sitt svo við þurfum að fara þangað yfir til að passa fyrir hana ef hún þarf að fara út. Þetta er óvenjukalt og andlitið hreinlega frýs á manni þegar maður fer út,“ segir Jóhann.

Hann segir vegi ísi lagða og að margir bílar hafi farið út fyrir vegi eða þeir oltið. „Þetta er búið að vera dálítið kalt og ég þarf að vera hér í kjallaranum mínum að kynda því annars frjósa bara rörin.“