Karlar meira en tvöfalt líklegri til að vera handteknir

Næstum því helmingur þeldökkra karlmanna í Bandaríkjunum og um 40 prósent hvítra karlmanna hafa verið handteknir áður en þeir ná 23 ára aldri. Þetta eru niðurstöður nýrrar rannsóknar sem framkvæmd var af teymi vísindamanna við Háskólann í Suður-Karolínu í Bandaríkjunum.

„Vandinn er sá að margir karlmenn - og þá sérstaklega svartir karlmenn - eru að takast á við það að komast á fullorðinsár með farangur og vandamál á bakinu vegna samskipta sinna við refsivörslukerfið," segir Robert Brame í fréttatilkynningu en hann fór fyrir rannsókninni.

„Neikvæðar afleiðingar þessa geta verið mjög miklar," bætir hann við. „Skráningar vegna afbrota geta komið upp í tengslum við atvinnuleit, dregið úr aðgangi að húsakosti, komið í veg fyrir aðgang og fjármögnun að framhaldsnámi, og haft áhrif á ýmis réttindi á borð við kosningarétt og rétt til ættleiðinga."

Karlar mun frekar handteknir

Rannsóknin greindi mismunandi handtökutíðni á milli kynja og kynþátta, og í ljós kom að mun minni munur var á milli handtökutíðni eftir kynþætti meðal kvenna. Þannig eru 20 prósent líkur á að hvítar konur séu handteknar fyrir 23 ára aldur á meðan líkurnar eru 18 prósent fyrir svartar og 16 prósent fyrir konur af spænskum uppruna.



Brame segir niðurstöður rannsóknarinnar sláandi og að brýnt sé að komast að því hvaða efnahagslegu, félagslegu og lagalegu þættir hafa áhrif, auk þess sem rannsaka þarf hvaða áhrif kyn og kynþáttur hafi.