Januzaj spilaði sinn fyrsta leik fyrir Belga

Romelu Lukaku, framherji Chelsea sem var á láni hjá Everton í ensku úrvalsdeildinni í vetur, skoraði þrennu í auðveldum 5-1 sigri Belgíu gegn Lúxemborg í vináttulandsleik í Genk í kvöld.

Lukaku kom heimamönnum yfir strax á þriðju mínútu en gestirnir jöfnuðu nokkuð óvænt tíu mínútum síðar, 1-1. Framherjinn kraftmikli bætt við öðru marki á 23. mínútu og því þriðja á 54. mínútu áður en hann var tekinn af velli.

Nacer Chadli, leikmaður Tottenham, kom Belgum í 4-1 með marki á 71. mínútu og Kevinde Bruyne innsiglaði sigurinn, 5-1, með marki úr vítaspyrnu einni mínútu fyrir lok venjulegs leiktíma.

Adnan Januzaj, ungstirnið í röðum Manchester United, spilaði sinn fyrsta landsleik fyrir Belgíu í kvöld en hann kom á í hálfleik.

Januzaj átti nokkra góða spretti en tókst ekki að skora. Hann lagði upp dauðafæri fyrir samherja inn hjá Man. Utd, Marouane Fellaini, þegar fjórar mínútur voru til leiksloka en sá hárprúði þrumaði yfir af stuttu færi.

Januzaj, sem gat valið á milli fjölmargra landsliða, spilaði sinn fyrsta aðalliðssleik fyrir Manchester United í ágúst á síðasta ári þegar hann kom inn á fyrir Robin van Persie í leiknum um Samfélagsskjöldinn.

Hann er nú, tíu mánuðum síðar, á leið á HM 2014 en Marc Wilmots, landsliðsþjálfari Belgíu, valdi hann í hópinn sem ferðast til Brasilíu í næsta mánuði.

Belgíska liðið er talið líklegt til afreka á HM en í byrjunarliði þess í kvöld voru sjö leikmenn úr ensku úrvalsdeildinni og tveir til viðbótar komu inn á sem varamenn. Alls eru tólf leikmenn úr úrvalsdeildinni ensku í HM-hópnum.

Aðeins einn leikmaður sem spilar í heimalandinu var í byrjunarliðinu en það var markvörðurinn SammyBossut, samherji Ólafs Inga Skúlasonar hjá Zulte-Waregem.

Aðalmarkvörðurinn Thibaut Cortois fékk lengra frí vegna þátttöku sinnar í úrslitaleik Meistaradeildarinnar á laugardaginn og Simon Mignolet, markvörður Liverpool, sat allan tímann á bekknum.