Blatter vill innleiða notkun myndbanda

Sepp Blatter, forseti FIFA, sagðist á Soccerex ráðstefnunni í Manchester vilja innleiða notkun myndbanda til að skera úr um réttmæti ákvarðana dómara. Blatter vill að hvor þjálfari fái a.m.k. einu sinni í hálfleik að skoða ákvörðun dómara á myndbandi.

„Þeir fá tækifæri einu sinni eða tvisvar í hálfleik til að véfengja ákvörðun dómarans, en aðeins þegar boltinn er úr leik“ sagði Blatter.

„Dómarinn og þjálfarinn munu líta á atvikið á sjónvarpsskjá. Dómarinn getur síðan breytt ákvörðun sinni eins og t.d. í tennis,“ bætti Blatter við, en hann sagði jafnframt að mögulega yrði þessi breyting prufukeyrð á HM U-20 ára í Nýja-Sjálandi á næsta ári.

Blatter tilkynnti í dag að hann myndi bjóða sig fram til endurkjörs sem forseti FIFA. Hann hefur setið á forsetastóli frá árinu 1998. Verði hann kjörinn í júní á næsta ári mun hann sitja sitt fimmta kjörtímabil.

Fresturinn til að bjóða sig fram rennur út í janúar 2015, en Frakkinn Michel Platini, forseti UEFA, gaf það nýlega út að hann myndi ekki fara fram gegn Blatter á næsta ári.

Fimm af sex heimsálfum, sem eiga aðild að FIFA, hafa þegar lýst yfir stuðningi sínum við Blatter, en Evrópa er sú eina sem er mótfallin Svisslendingnum umdeilda.