Lagði sér rottur til munns á fjögurra mánaða þvælingi um Andesfjöll

Raul Fernando Gomez, 58 ára gamall Úrúgvæi, komst loks til byggða í Argentínu í gær eftir að hafa ráfað týndur um Andesfjöll í fjóra mánuði.

Gomez hugðist hjóla milli Sile og Argentínu yfir Andesfjöll í maí síðastliðnum, en eftir að hjólið hans bilaði áfréð hann að ganga niður úr fjöllunum. Hann lenti hins vegar tvisvar í vonskuveðri og stórhríð og villtist af leið.



Hann ráfaði því stefnulaust um en lifði á sykri og rúsínum sem hann hafði með sér og matarskömmtum úr neyðarskýlum. Hann sagðist auk þess hafa veitt sér rottur til matar.



Gomez var sæmilega haldinn þegar hann fannst, miðað við aðstæður, en þjáðist af vatnsskorti og hafði lést um 20 kíló.