Vill endurtalningu í Moskvu

Rússneski stjórnarandstæðingurinn Alexei Navalní hefur krafist þess að atkvæði í borgarstjórakosningununum sem fram fóru í Moskvu verði talin á ný.

Sergei Sobjanín, sem er fyrrverandi starfsmannastjóri í Kreml og álitinn hallur undir Vladimír Pútín forseta, hlaut rétt rúmlega 51 prósent af atkvæðum. Það tryggði að ekki þurfi að kjósa á milli Sobjaníns og Navalní, sem varði í öðru sæti með 27% atkvæða, sem þótti vonum framar.

„Við viðurkennum ekki úrslit þessara kosninga,“ sagði Navalní. „Sobjanín getur ekki komið fram sem borgarstjóri allra íbúa Moskvu og getur ekki litið á sig sem réttkjörin borgarstjóra, nema að hann hlýti kröfum okkar og leyfi endurtalningu atkvæða."

Talsmaður Navalnís segir að meginathugasemd þeirra lúti að því að þeim þyki hlutfall Sobjaníns af atkvæðum greiddum heiman frá fólki vera óeðlilegt.

Golos, helsta óháða kosningaeftirlitsstofnun Rússlands, sagði í gær að kosningarnar hefðu gengið vel fyrir sig. Í dag sýna hins vegar samanlagðar tölur ýmissa eftirlitsaðila víða um borgina, og birtar eru á vef Golos, að Sobjanín hafi einungis hlotið 49,5 % atkvæða, sem hefði þýtt að kjósa þyrfti milli Sobjaníns og Navalnís.