Sigur hægri flokkanna í Noregi

Hægri flokkarnir hafa tryggt sér sigur í þingkosningum í Noregi, standist fyrstu tölur. Stjórn Jens Stoltenbergs, leiðtoga Verkamannaflokksins, hefur því misst þingmeirihluta sinn.

Samkvæmt fyrstu tölum fá hægri flokkarnir samtals 93 þingmenn en vinstri flokkarnir 74 þingmenn. Erna Solberg, leiðtogi Hægri flokksins, getur því fagnað sigri.

Verkamannaflokkurinn er engu að síður stærsti flokkurinn og fær 30,4 prósent atkvæða og 55 þingmenn, en Hægri flokkurinn er næst stærstur með 26,1 prósent og 46 þingmenn.

Síðustu kjörstöðum var lokað klukkan níu að norskum tíma, eða sjö að íslenskum tíma.