Stoltenberg viðurkennir ósigur

Jens Stoltenberg óskaði, á fundi með flokksfélögum sínum í kvöld, Ernu Solberg til hamingju með sigur hægri flokkanna í þingkosningum í Noregi. Hann þakkaði Ernu fyrir málefnalega kosningabaráttu, og lofaði sömuleiðis að halda uppi ábyrgri og uppbyggilegri stjórnarandstöðu næstu fjögur árin.

Solberg mætti sömleiðis á fund flokksfélaga sinna áðan og hrósaði sigri, þeim stærsta sem flokkurinn hefur unnið í þingkosningum í nærri þrjátíu ár. Hún boðaði stjórnarmyndunarviðræður með Framfaraflokknum og ætlar sér að leiða nýja stjórn sem forsætisráðherra.

Siv Jensen, leiðtogi Framfaraflokksins, fagnaði sömuleiðis sigri, sem hún sagði þann stærsta í sögu flokksins. Hún sagðist gera kröfu til að flokkurinn fái fjármálaráðherra í nýrri stjórn hægri flokkanna, sem tekur að öllum líkindum við af vinstri stjórn Stoltenbergs á næstu vikum.

Samkvæmt nýjustu tölum verða hægri flokkarnir með 96 þingmenn en fráfarandi stjórnarflokkar með 72 þingmenn. Þá ná Græningjar í fyrsta sinn einum manni inn á norska þingið.