Úthugsaður flótti fanga festur á filmu

Fangi er nú á flótta undan lögreglu í Bandaríkjunum eftir að hafa flúið úr ríkisfangelsi í Arakansas. Flóttinn var úthugsaður og náðist að hluta til á myndbandsupptöku öryggismyndavéla fangelsisins.

Hinn 33 ára gamli Derrick Estell var handtekinn í mars fyrir vopnað skartgriparán og hefur setið inni síðan. Í vikunni fékk hann leyfi til að hringja símtal í fangelsinu á meðan tveir öryggisverðir fylgdust með honum. Verðirnir voru svo truflaðir af öðrum fanga sem er talinn hafa verið í vitorði með Estell ásamt fleirum. Hann nýtti þá tækifærið og flúði í gegnum glugga og beinustu leið út um aðaldyr fangelsisins þar sem bifreið ók með hann á brott.

Lögreglan á svæðinu gerði árangurslausa tilraun til að veita fanganum eftirför. Nokkru síðar fannst bílinn yfirgefinn og bæði Estell og bílstjórinn á bak og brott.

Estell er nú eftirlýstur og sagður bæði vopnaður og hættulegur. Vefsíða Herald Sun greinir frá þessu.

Myndbandið af flóttanum er hægt að sjá í spilaranum hér að ofan.