Pakistanskur skemmtiþáttur gefur munaðarlaus börn í beinni

Pakistanski skemmtiþátturinn Aalim Aur Aalam vakti athygli og umtal á dögunum þegar munaðarlaus börn voru gefin í beinni útsendingu.

Þáttastjórnandinn Aamir Liaquat Hussain færði tveimur grunlausum pörum sitthvort stúlkubarnið og stendur til að gefa dreng á næstu dögum. „Mér brá í fyrstu. Ég trúði því ekki að það væri verið að gefa okkur barnið,“ segir Suriya Bilquees, kjörmóðir annarrar stúlkunnar.

Skemmtiþátturinn er gríðarlega vinsæll í Pakistan og er eins konar spurningaþáttur þar sem þekking fólks á Kóraninum er könnuð. Auk barnanna hafa vélhjól verið gefin, örbylgjuofnar, þvottavélar og ísskápar.

Börnin sem voru gefin í þættinum koma frá NGO, góðgerðarsamtökum sem segjast taka við allt að 15 munaðarlausum börnum í hverjum mánuði. Uppátækið hefur mælst misjafnlega fyrir. Sumir kalla það auglýsingabrellu á meðan aðrir fagna því.

„Liðsmenn samtaka okkar finna börn úti á götu, í ruslatunnum, sum af þeim látin, önnur með áverka eftir dýr. Hví ekki að tryggja að barninu sé tryggt gott líf og gott heimili?“ spyr Ramzan Chhipa, forsvarsmaður samtakanna.

„Við gáfum ekki bara börnin. Þetta fólk hafði áður skráð sig á biðlista hjá okkur og hitt okkur fjórum eða fimm sinnum.“ Pörin höfðu þó ekki hugmynd um að þeim yrðu gefin börnin í beinni útsendingu.