Eiður Smári skoraði á móti gömlu félögunum

Eiður Smári Guðjohnsen opnaði markareikninginn sinn hjá Club Brugge í kvöld þegar hann skoraði eitt marka liðsins í 3-0 sigri á hans gömlu félögum í Cercle Brugge í leik liðanna í belgísku úrvalsdeildinni í fótbolta.

Leikurinn átti að vera fyrsti leikur Eiðs Smára með Club Brugge í janúar en var frestað vegna mikillar snjókomu.

Eiður Smári kom inn á sem varamaður á 83. mínútu og kom síðan Club Brugge í 2-0 á fyrstu mínútu í uppbótartíma. Burundi-maðurinn Mohamed Tchité átti stoðsendinguna en hann kom líka inn á sem varamaður.

Hin mörk Club Brugge í leiknum skoruðu þeir Óscar Duarte (44. mínúta) og Vadis Odjidja-Ofoe (90.+3 mínúta).

Arnar Þór Viðarsson lék allan leikinn með Cercle Brugge.

Þetta var sjötti deildarleikur Eiðs Smára fyrir Club Brugge en hann skoraði 6 mörk í 13 leikjum með Cercle Brugge fyrir áramót.