Þrjátíu fangaverðir úr Auschwitz ákærðir

Þýsk stjórnvöld hyggjast sækja þrjátíu fyrrverandi fangaverði við útrýmingarbúðirnar í Auschwitz til saka fyrir þátttöku sína í ódæðum nasista á tímum seinni heimsstyrjaldarinnar.

Sérstakt saksóknaraembætti sem hefur með höndum að rannsaka glæpi nasista, var með mál 50 fyrrum fangavarða til rannsóknar, en ákvað að ákæra þrjátíu.

Ekki var tilkynnt um hvaða einstaklinga væri að ræða, en það verður gefið út á seinni stigum.

Rannsóknir á fyrrverandi fangavörðum hófust af krafti eftir að John Demjanjuk var sakfelldur árið 2011, en hann var fangavörður í Sobibor búðunum.

Demjanjuk lést í fyrra á meðan áfrýjunarferli í máli hans stóð enn yfir, en mál hans gaf fordæmi fyrir því að hægt verði að sakfella fyrrverandi fangaverði fyrir að vera samsekur í morðum, þrátt fyrir að engin bein sönnun sé fyrir að þeir hafi drýgt ódæði persónulega.