Gullnámumenn í verkfalli

Um 80 þúsund gullnámumenn í Suður-Afríku hafa lagt niður störf. Samtök gullnámumanna boðaði verkfall fyrir skömmu og hefur farið fram á ríflega launahækkun. BBC greinir frá þessu. Upphaflega fóru gullnámumenn fram á allt að 60% launahækkun en eru nú tilbúnir til að snúa aftur til starfa fái þeir 10% launahækkun.

Gulliðnaður í Suður-Afríku er einn sá stærsti í heimi en hefur verið á niðurleið síðustu ár. Verkfallið setur efnahag í landinu í uppnám sem fyrir er veikburða. Susan Shabangu, námuiðnaðarráðherra Suður-Afríku, telur að á meðan verkfallinu standi verði iðnaðurinn af um 30 milljónum dala á dag. Allt kapp sé lagt á að ná samningnum.

Námueigendur vara við að ef ekki náist samningar á næstu dögum geti það orðið til þess að námum verði lokað. Það fæli í sér að þúsundir myndu verða af atvinnu sinni.