Sakar stjórn Stoltenbergs um ábyrgð á morði

„Rauðgræna meirihlutastjórnin hefur lát Önju á samviskunni,” skrifaði Carl I. Hagen, fyrrverandi leiðtogi norska Framfaraflokksins, á Facebook-síðu sína.

Hann eyddi færslunni skömmu síðar, eftir að hafa fengið hörð viðbrögð, meðal annars úr eigin flokki. Þingkosningar verða í Noregi á mánudag.

„Sumum þótti þetta dálítið harkaleg framsetning,” sagði Hagen í viðtali á vefsíðu norska dagblaðsins Verdens Gang. „En ég stend við meginboðskapinn, og það er að vægar refsingar og langar biðraðir eftir fangelsisplássi hafa afleiðingar af þessu tagi.”

Hagen er þarna að tala um morðið á rúmlega tvítugri stúlku, sem hét Anja Weløy Aarseth. 23 ára gamall maður hefur nú játað á sig morðið, en hann hefur áður hlotið dóma fyrir ofbeldisbrot, bæði í janúar á þessu ári og í október á síðasta ári.

Hagen gaf ekki upp hvort það hafi verið Siv Jensen, arftaki hans í formennsku Framfaraflokksins, sem bað hann um að eyða Facebook-færslunni.

Hún hefur lagt mikla vinnu í að má af flokknum þá ímynd lýðskrums og tækifærismennsku, sem stóryrtar yfirlýsingar Hagens gáfu honum.

Framfaraflokkurinn hefur verið að mælast með rúmlega 15 prósenta fylgi í skoðanakönnunum undanfarið, sem er töluvert minna en í síðustu þingkosningum. Þá fékk flokkurinn tæp 23 prósent atkvæða.

Hægri flokkunum er hins samanlagt, að Framfaraflokknum meðtöldum, spáð nægilega miklu fylgi til að fella vinstristjórn Jens Stoltenbergs.

Til þessa hafa hægriflokkarnir ekki viljað hafa Framfaraflokkinn með í stjórn, en breytt ímynd flokksins með Siv Jensen í forystunni hefur orðið til þess að nú bendir allt til að hann komist til valda í fyrsta sinn.