Kim Jong-un orðinn doktor í hagfræði

HELP háskólinn í Malasíu situr nú undir vaxandi gagnrýni fyrir að veita leiðtoga Norður Kóreu, Kim Jong-Un, heiðursdoktorsnafnbót. Leiðtoginn ungi getur því nú titlað sig doktor í hagfræði. Athöfn þar sem þetta var staðfest var haldin í sendiráði Norður Kóreu í Kúala Lúmpúr í byrjun október og vakti litla athygli.

Síðustu daga hefur ákvörðunin hinsvegar valdið úlfúð í Malasíu en ekki er vitað mikið um bakgrunn leiðtogans og alls óvíst hvort hann viti nokkuð um hagfræði. Rektor skólans segir hinsvegar að ákveðið hafi verið að veita leiðtoganum nafnbótina, til þess að styrkja samskipti þjóðanna tveggja.