Þátttaka Pakistans í drónaárásum staðfest

Stjórnvöld í Pakistan tóku beinan þátt í drónaárásum Bandaríkjamanna innan eigin landamæra þrátt fyrir að hafa aldrei gengist við slíku. Þetta kemur fram í frétt Washington Post í dag.

Blaðið vitnar í leyniskjöl, meðal annars minnisbréf, sem þeir komust yfir, en þar segir meðal annars á einum stað að drónaárás hafi verið gerð „að beiðni“ pakistanskra stjórnvalda og á öðrum stað er talað um möguleg skotmörk sem hafi verið sett upp í samstarfi leyniþjónustustofnannanna CIA í Bandaríkjunum og ISI í Pakistan.



Síðustu ár hafa hundruð óbreyttra pakistanskra borgara fallið í drónaárásum Bandaríkjamanna, sem beinast gegn Talibönum og öðrum víga- eða hryðjuverkahópum. Árásirnar hafa vakið mikla reiði í landinu og pakistönsk stjórnvöld hafa gagnrýnt þessar aðgerðir og sagt þær brjóta gegn fullveldi landsins. Nú er hins vegar staðfest að árásirnar voru gerðar með þeirra samþykki og stjórnvöld og leyniþjónustan tóku beinan þátt í að skipuleggja þær.

Í raun eru þetta ekki ný tíðindi þar sem lengi hefur verið gert ráð fyrir því að Pakistan veiti að minnsta kosti þegjandi samþykki fyrir árásunum. Til dæmis kom fram í einu skjali sem lekið var til Wikileaks og birt árið 2010 að Yousuf Raza Gilani, þáverandi forsætisráðherra hafi sagt um árásirnar: „Mér er sama hvað þeir gera, á meðan þeir ná rétta fólkinu. Við munum mótmæla þessu á þinginu og svo gleyma málinu.“

Nú hefur þetta hins vegar verið staðfest, sem setur Nawas Sharif, forsætisráðherra Pakistans, í vandræðalega stöðu þar sem hann hefur verið afar gagnrýninn í garð Bandaríkjanna síðustu daga.

Fyrir skemmstu voru birt frumdrög skýrslu frá Sameinuðu þjóðunum þar sem fram kemur að um 400 óbreyttir pakistanskir borgarar hafi fallið í drónaárásum.