Fárviðri skellur á í Bretlandi

Bretar bjuggu sig í gær undir eitt mesta fárviðri sem skollið hefur á Bretlandi árum saman. Veðrið kallaði á neyðarráðstafanir á borð við þær að lestarferðir yrðu felldar niður og flugferðir sömuleiðis.

Fólk var eindregið hvatt til að halda sig heima í dag, að minnsta kosti eitthvað fram eftir morgni.

Veðrið skall á síðdegis í gær suðvestantil og átti að færast smám saman austur og norður yfir landið í dag. Undir kvöld má búast við því að Danir og Svíar fari að finna fyrir þessu veðri.

David Cameron, forsætisráðherra Bretlands, boðaði almannavarnir á sinn fund í gær.

Gefnar hafa verið út flóðaviðvaranir og nokkrum brúm hefur verið lokað. Þá hefur verið ákveðið að sleppa sorphirðu í dag.