Wicks ekki í marki Þórsara í kvöld

Bandaríski markvörðurinn Joshua Wicks spilar ekki með Þórsliðinu á móti Fylki í kvöld en liðin mætast þá á Fylkisvellinum í 5. umferð Pepsi-deildar karla og verður leikurinn í beinni útsendingu á Stöð 2 Sport. Joshua Wicks segir á twitter-síðu sinni að hann missi af leiknum af því að konan hans á von á sér á hverri stundu.

„Ég óska strákunum góðs gengis í útileiknum í dag. Skilið ykkar vinnu," skrifar Josh Wicks á twittersíðu sína. Þegar Atli Sigurjónsson, fyrrum Þórsari og núverandi KR-ingur, spyr hann um ástæðuna þá svarar þessi stóri og stæðilegi markvörður: „Konan á von á sér á hverri stundu."

Josh Wicks hélt hreinu í fyrsta sinn í sumar í síðasta leik þegar Þórsliðið vann 1-0 sigur á Ólafsvíkur-Víkingum á Þórsvellinum. Þórsliðið er ekkert í slæmum málum hvað varðar markverði því varamarkvörður liðsins er Srdjan Rajkovic en hann stóð í marki Þórs í Pepsi-deildinni sumarið 2011.