17 látnir á Indlandi eftir fellibyl

Indverjar eru byrjaðir að fara yfir umfang tjóns sem varð eftir öflugan fellibyl sem fór yfir Indland um helgina. Þúsundir heimila eyðilögðust eftir að flæddi inn í bæi. Yfirvöld á Indlandi segja rýmingaráætlanir í Orissa-héraði og nágrenni hafa bjargað fjölda mannslífa en um milljón íbúum var gert að yfirgefa heimili sín í aðdraganda fellibylsins.

Yfirvöld vita enn aðeins um sautján dauðsföll vegna veðursins en búist er við að tölur um mannfall muni hækka. Fellibylurinn er sá öflugasti í yfir áratug sem fer yfir Indland.

Eignatjón er mikið og bylurinn eyðilagði gríðarlega mikla og verðmæta uppskeru í landinu.

Vöruflutningaskip sökk á Bengalflóa og átján manna áhöfn þess týndist daglangt en fannst í björgunarbáti um 185 kílómetrum frá Indlandsströnd í gær. Veðrið er að ganga niður samkvæmt yfirvöldum á Indlandi.