Keypti gröf við hlið Oswalds

Lengi hafa þeir sem fyrir forvitni sakir hafa lagt leið sína að gröf Lee Harvey Oswald velt því fyrir sér hver Nick Beef hafi verið, en legsteinn hans er við hlið legsteins Oswalds í kirkjugarðinum í Fort Worth í Texas.

Ráðgátan hefur nú verið leyst. Beef er enn á lífi, er 56 ára gamall og býr í New York ásamt fjölskyldu sinni.

Hann segist hafa keypt legstæðið árið 1975, þegar hann var átján ára, og sett legsteininn þar árið 1997.

Hann kann hins vegar engar skýringar á athæfinu og segist alls ekki ætla að láta grafa sig við hlið mannsins sem myrti Kennedy forseta. Helst vilji hann láta brenna líkið af sér.