Kerry ánægður með Assad

John Kerry utanríkisráðherra Bandaríkjanna segir að Bashar Al -- Assad forseti Sýrlands og samstarfsmenn hans í Damaskus eigi hrós skilið fyrir að standa hingað til við gerða samninga um eyðingu efnavopna í landinu.

Alþjóðlegir eftirlitsmenn lýstu því yfir í gær að verkefnið væri formlega hafið. Kerry segir það afar þýðingarmikið að ekki skyldi þurfa að líða nema ein vika frá því ályktun um eyðingu vopnanna var samþykkt hjá Sameinuðu þjóðunum og þar til hægt var að hefjast handa við verkið. Þó er ekki búist við því að verkefnið gangi áfallalaust fyrir sig.

Um þúsund tonn af Sarín-gasi og sinnepsgasi er að ræða og er vopnunum dreift vítt og breitt um Sýrland. Sum vopnabúrin eru til dæmis á svæðum sem lúta stjórn uppreisnarmanna.