Mannfall í stríðinu gegn glæpagengjum í Mexíkó

Að minnsta kosti 20 meðlimir glæpagengja í Mexíkó hafa fallið að undanförnu, í Michoacan ríki einu, í átökum við lögreglu og herinn.

Þá hafa tveir lögreglumenn fallið í skotbardaga eftir að gengi hafa sett upp vegatálma og setið fyrir lögreglusveitum. Það eru hinir ógnvænlegu og voldugu meðlimir Riddarareglunnar, eiturlyfjahrings, sem ráða lögum og lofum í þessum hluta landsins.

Í maí sendi Enrique Pena Nieto forseti hershöfðingja til að taka yfir löggæslu á svæðinu, en eftir það hafa átök harðnað.

Fyrr í þessum mánuði var einhver alræmdasti glæpamaður Mexíkó handtekinn þegar leiðtogi los Zetas-glæpagengisins var gripinn. Háar fjárhæðir höfðu verið settar til höfuðs Miguel Angel Trevino Morales.

Um 60 þúsund manns hafa fallið í átökum lögreglu og hers við glæpagengi í Mexíkó eftir að Felipe Calderon kom að málum og hóf að stýra hernum í aðgerðum gegn eiturlyfjagengjum.