Vonarglæta fyrir Grikkland

Grísk stjórnvöld eru vongóð um að eftir erfið ár sem einkenndust af samdrætti hafi tekist að snúa við þróuninni og nú sé útlit fyrir að hagvöxtur verði á næsta ári.

Samkvæmt drögum að fjárlagafrumvarpi næsta árs verður þar 0,6 prósenta hagvöxtur. Það verður í fyrsta sinn frá árinu 2007 sem efnahagur landsins vex.

Fá lönd urðu eins illa úti í fjármálakreppunni eftir fall bandarísku bankanna fyrir fimm árum og ef fram fer sem horfir mun efnahagur Grikklands hafa dregist saman um fjórðung frá því fyrir hrun.

Meðal annarra jákvæðra teikna sem er að finna í skjalinu er að gert er ráð fyrir því að afgangur verði á rekstri ríkisins, utan afborgana af lánum, og að atvinnuleysi fari minnkandi.

Þó er það skuldastaðan sem er alvarlegasta vandamálið, en gert er ráð fyrir því að skuldir ríkisins muni nema 174,5 prósentum af landsframleiðslu á næsta ári.

Lokaútgáfa af frumvarpinu verður nú borin undir lánadrottna Grikklands og kemur líklega fyrir þingið í desember.