Megináherslan á atvinnulífið

Forvígiskonur Hægriflokksins og Framfaraflokksins í Noregi tilkynntu í gærkvöldi að samkomulag hefði tekist milli flokkanna um myndun ríkisstjórnar.

Erna Solberg, formaður Hægri og verðandi forsætisráðherra, og Siv Jensen, formaður Framfaraflokksins, tilkynntu á blaðamannafundi í gær að samkomulagið fæli í sér átta meginatriði. Fyrst að styrkja atvinnulífið, fjölga störfum og efla einkaframtakið. Þá á að draga úr skrifræði, bæta stöðu kennara, bæta vegakerfið og styrkja velferðarkerfið. Þá á að skoða hvort lögreglumenn eigi almennt að vera vopnaðir og innflytjendalöggjöf verður hert. Loks verður sveitarfélögum fækkað og verkefni flutt frá ríki í hérað.

Vonast er til þess að hægt verði að tilkynna um ráðherraskipan fyrir 18. október.

Flokkarnir tveir hlutu samtals um 45 prósent atkvæða í þingkosningunum í síðasta mánuði og eru með 77 af 169 þingmönnum. Það var nóg til að fella stjórn Jens Stoltenberg en viðræður allra fjögurra flokkanna á hægri vængnum um stjórnarmyndun fóru út um þúfur þar sem minni flokkarnir tveir vildu ekki vinna með Framfaraflokknum sökum afstöðu hans í málefnum innflytjenda.