Læknandi gerlar úr saur í pillur

Vísindamenn við háskólann í Calgary í Kanada hafa fundið nýstárlega leið til þess að lækna sýkingar í þörmum. Um 14.000 Bandaríkjamenn látast árlega af sýkingu sem kallast C-diff. Lækning hefur hingað til meðal annars falist í því að hægðum úr heilbrigðri manneskju hefur verið komið fyrir í þörmum sjúklings.

Nýja aðferðin felst hins vegar í því að auðvelda ferlið með því að taka gerla úr heilbrigðum hægðum og koma fyrir í pillu sem tekin er inn á hefðbundinn hátt.

„Það er enginn saur í þessu, bara gerlar úr saur,“ segir dr. Thomas Louie, sem fór fyrir rannsókninni. „Fólk er ekki að leggja sér kúk til munns.“