Þreifingar um stjórnarmyndun í Þýskalandi komnar á fullt

Angela Merkel, kanslari Þýskalands, og flokkur hennar, Kristilegir demókratar, hófu í gær könnunarviðræður við Jafnaðarmannaflokkinn um myndun nýrrar ríkisstjórnar.

Merkel vann stórsigur í nýafstöðnum kosningum þar sem flokkur hennar var fimm þingsætum frá því að ná hreinum meirihluta á þingi. Samstarfsflokkur hennar í ríkisstjórn, Frjálsir demókratar, féll út af þingi. Jafnaðarmenn hlutu rúman fjórðung atkvæða.

Hermann Gröhe, aðalritari Kristilegra demókrata, sagði í gær að andrúmsloftið á fundinum hefði verið „gott og uppbyggilegt“ og að næst yrði fundað hinn 14. þessa mánaðar.

Gröhe sagði að á fundinum hefði aðallega verið litið til málaflokka þar sem flokkarnir ættu samleið en ekki þeirra þar sem ósættis væri að vænta. Peer Steinbrück, sem var kanslaraefni Jafnaðarmanna en steig til hliðar eftir kosningarnar, kallaði meðal annars í kosningabaráttunni eftir lögbundnum lágmarkslaunum og hærri sköttum á hátekjufólk. Merkel og flokkur hennar höfnuðu hins vegar slíkum hugmyndum.

Nái flokkarnir saman hefði stjórn þeirra afar traustan meirihluta á þingi en margir innan Jafnaðarmannaflokksins eru fullir efasemda um slíkt samstarf, enda kom flokkurinn illa út úr kosningum eftir samsteypustjórn sömu flokka á árunum 2005 til 2009.

Í síðustu viku lofuðu forvígismenn jafnaðarmanna að bera samstarfið undir flokksmenn, sem telja tæplega hálfa milljón.

Ef upp úr slitnar hafa Merkel og Kristilegir demókratar hins vegar valkost um að ganga til samstarfs með Græningjaflokknum sem hlaut 8,4 prósent atkvæða, þeim til mikilla vonbrigða. Könnunarviðræður milli flokkanna fara fram næstkomandi fimmtudag.

Frekar ólíklegt þykir þó að flokkarnir nái saman, enda standa þeir ansi fjarri hvor öðrum í mörgum lykilmálaflokkum.

„Við stefnum að því að komast að niðurstöðu sem fyrst því að það er ljóst að stjórnarmyndunarviðræður munu taka nokkurn tíma,“ sagði Gröhe. „Við ætlum að vanda okkur við þetta en áttum okkur á því að þjóðin bíður eftir því að málin skýrist.“