979 féllu í Írak í síðasta mánuði

Alls féllu 979 íraskir borgarar í ofbeldisverkum sem framin voru í landinu í september. Þetta kemur fram í nýrri skýrslu sendinefndar Sameinuðu þjóðanna í landinu, en þar segir einnig að 2.133 hafi slasast í átökunum. Langflestir hinna föllnu, 887 talsins, voru almennir borgarar eða lögreglumenn.

Mannfallið var nokkru minna en var í júlí, þegar 1.057 féllu, en engu að síður einn af mannskæðustu mánuðum í Írak í seinni tíð.

418 létu lífið í höfuðborginni Bagdad einni í september, en mikil ofbeldisbylgja með átökum milli trúarhópa hefur gengið yfir landið síðustu mánuði og hefur ástandið ekki verið verra frá árinu 2008 þegar borgarastyrjöld ríkti í landinu auk þess sem þar var fjölmennt herlið frá Bandaríkjunum.

Óöldin hófst þegar öryggisveitir stjórnvalda, sem eru undir forystu sjíta, lögðu til atlögu við mótmælendur úr hópi súnníta í apríl síðastliðnum. Síðan þá hafa á sjötta þúsund manna fallið í ofbeldisverkum.