Fá verðlaun fyrir góðverk sín

Þetta árið koma „hin Nóbelsverðlaunin“, eins og hins sænsku Right Livelihood Award eru stundum nefnd, í hlut fjögurra einstaklinga sem allir hafa unnið að því að bæta heiminn með einhverjum hætti.

Bandaríkjamaðurinn Paul Walker hefur barist fyrir útrýmingu efnavopna, Palestínumaðurinn Raji Súrani er lögfræðingur sem hefur unnið að mannréttindamálum Palestínumanna, Kongómaðurinn Denis Mukwege er kvensjúkdómalæknir sem hefur aðstoðað tugi þúsunda kvenna sem hefur verið nauðgað í Kivu-héraði í Kongó og svissneski jarðræktarfræðingurinn Hans Rudolf Herren hefur aðstoðað bændur víða um heim við að útrýma hungri, fátækt og sjúkdómum.

Verðlaunaféð nemur tveimur milljónum sænskra króna, þannig að hver verðlaunahafi fær jafngildi tæpra tíu milljóna íslenskra króna í sinn hlut.

Þessi verðlaun nefnast Right Livelihood Award og var til þeirra stofnað árið 1980 af þýsk-sænska rithöfundinum Jakob von Uexküll. Tilgangurinn var sá að vekja athygli á starfsemi sem hann telur fram hjá gengið við veitingu Nóbelsverðlaunanna.