Olíusjóðnum jafnvel skipt upp

Svo gæti farið að innan tíðar verði gerðar nokkrar breytingar á starfsemi norska olíusjóðsins, sem er stærsti fjárfestingasjóður heims í ríkiseigu. Forsvarsmenn flokkanna sem eru líklegastir til að fara fyrir nýrri ríkisstjórn, Hægri flokksins og Framfaraflokksins, hafa lýst yfir áformum um að skipta sjóðunum upp og auka heimildir hans til fjárfestinga innan lands sem utan.

Sjóðurinn situr nú á eignum að verðmæti rúmlega 90.000 milljarða íslenskra króna og í hverri viku bætast um það bil 120 milljarðar í púkkið vegna ágóða af olíu- og gasvinnslu. Sjóðurinn á hlut í 7.500 fyrirtækjum um allan heim en hlutabréfaeign hans jafngildir um það bil einu prósenti af öllum hlutabréfum heims og tveimur prósentum af öllum hlutabréfum í Evrópu.

Þrátt fyrir góða stöðu sjóðsins eru margir á því að breytinga sé þörf. Til að mynda eru uppi hugmyndir um að kljúfa frá honum hluta sem yrði skipt í þrjá aðra sjóði. Þá yrði fjárfestingarmöguleikum sjóðsins fjölgað og jafnvel auknar heimildir ríkisins til að ráðstafa fé úr sjóðnum innanlands.

Málefni olíusjóðsins verða án efa eitt af stærstu pólitísku málefnunum í Noregi á komandi misserum. Ósennilegt er þó að róttækar breytingar verði gerðar þar sem norsku flokkarnir virðast einhuga um að ná samstöðu um framtíðarskipan sjóðsins.