Útséð með aðgerðir gegn stjórn Bashars al-Assad í bili

Útséð er með að vesturveldin geri árásir á skotmörk í Sýrlandi á allra næstu dögum eftir að Barack Obama Bandaríkjaforseti vísaði um helgina ákvörðun um hernaðaríhlutun til þingsins.

Rannsóknarteymi á vegum Sameinuðu þjóðanna sem hefur skoðað verksummerki á stað þar sem sýrlenski stjórnarherinn er sakaður um að hafa beitt efnavopnum, sneri aftur til Hollands á laugardag og hefst nú handa við að skera úr um hvað átti sér stað. Ekki er vitað hvenær þær niðurstöður gætu legið fyrir.

John Kerry, utanríkisráðherra Bandaríkjanna, sagði í samtali við fjölmiðla í gær að Bandaríkjamenn hefðu sannanir fyrir því að sarín-gas hefði verið notað í mannskæðum árásum í úthverfi Damaskus hinn 21. ágúst. Hann segir niðurstöður rannsókna á hár- og blóðsýnum, sem safnað var eftir árásina, staðfesta þetta og gaf jafnframt í skyn að þær sannanir sem hann hefði undir höndum væru ekki frá Sameinuðu þjóðunum.

Árásin er talin hafa kostað yfir 1.400 manns lífið, þar af tæplega fimm hundruð börn.

Barack Obama, forseti Bandaríkjanna, ákvað á laugardag að fresta árásum sem beina átti gegn sýrlensku ríkisstjórninni þangað til samþykki Bandaríkjaþings lægi fyrir. Þessi sinnaskipti komu nokkuð á óvart, enda hafði Obama á fyrri stigum málsins lýst því yfir að litið yrði á notkun efnavopna sem ákveðna rauða línu, sem myndi kalla á aðgerðir.

Heimildir innan bandaríska stjórnkerfisins herma að Obama hafi verið ákveðinn í að boða hernaðaraðgerðir, en hafi snúist hugur á föstudagskvöld og ákveðið að leita samþykkis hjá þinginu. Forsetinn sagði í ávarpi á laugardag að aðgerðir af hálfu Bandaríkjanna yrðu takmarkaðar að umfangi og útilokaði að landhernaði yrði beitt.

Þótt Kerry tæki skýrt fram að forsetinn hefði vald til að taka ákvörðun sem þessa, og segðist sannfærður um að þingið heimili hernaðaríhlutun Bandaríkjanna í Sýrlandi, túlkuðu margir, þar á meðal ráðamenn í Sýrlandi, þetta útspil forsetans sem veikleikamerki og hik.

Í gær blés Bashar al-Assad Sýrlandsforseti á allar fyrirætlanir um ?erlenda yfirgangssemi?. Þeim yrði mætt af hörku ?rétt eins og Sýrland mætir innlendum yfirgangsseggjum á hverjum degi, bæði hryðjuverkahópum og þeim sem styðja þá?.

Breska þingið hafnaði í síðustu viku tillögu frá David Cameron forsætisráðherra um leyfi til að beita hervaldi gegn Sýrlandsstjórn. Aukinn þrýstingur hefur verið á François Hollande Frakklandsforseta, sem styður vopnaða íhlutun í Sýrlandi, að leggja málið fyrir þingið. Honum ber ekki skylda til slíks, en fyrirhugað er að taka málið upp á þingi á miðvikudag.