Annað vitnið lýgur, hitt ruglar

Vörn kínverska stjórnmálamannsins Bo Xilai, sem sakaður er um víðtæka spillingu, er byggð á einföldum meginatriðum: Annað lykilvitni ákæruvaldsins lýgur, hitt er ruglað.

Bo hefur haldið uppi óvenju líflegri vörn við réttarhöldin, sem vakið hafa mikla athygli jafnt innan Kína sem utan.

Hann var með vinsælli stjórnmálamönnum landsins þar til fréttir fóru að berast af spillingu og misbeitingu valds. Þau mál komust í hámæli þegar eiginkona hans, Gu Kailai, myrti breskan kaupsýslumann á síðasta ári. Hún hlaut skilorðsbundinn líflátsdóm fyrir morðið fyrr í þessum mánuði.

Ákæruvaldið byggir málflutning sinn gegn Bo einkum á vitnisburði eiginkonunnar og lögreglustjórans Wang Lijun, sem var náinn samstarfsmaður Bos.

Bo talar af mikilli sannfæringu þegar hann segir Wang ljúga, en eiginkonu sína vera snarruglaða. Hann er meðal annars sakaður um að hafa misnotað vald sitt til að reyna að koma í veg fyrir rannsókn á morðinu, sem eiginkonan hefur verið dæmd fyrir.