Njósnatunnur á götum London

Borgaryfirvöld í London hafa krafist þess að auglýsingafyrirtækið Renew taki úr sambandi hátæknibúnað, sem komið hefur verið fyrir í nýstárlegum ruslatunnum og getur fylgst með ferðum fólks á götum borgarinnar.

Fyrirtækið hugðist selja upplýsingarnar auglýsendum, sem gætu valið hvaða auglýsingar birtust á tunnunum eftir því hvaða fólk er að ganga framhjá þeim.

Þannig gæti til dæmis auglýsing frá Burger King hamborgarakeðjunni birst á tunnu þegar maður, sem áður hefur snætt máltíð á McDonalds, nálgast hana.

Tunnurnar eru með útbúnað, sem nemur boð frá snjallsímum vegfarenda. Hægt er að senda vafrakökur í símana og þannig fylgjast með ferðum manna um hverfið, í hvaða verslanir er farið og jafnvel hve lengi er stoppað á hverjum stað.

Slíkar hátæknitunnur hafa nú þegar verið settar upp í fjármálahverfinu City, nálægt Pálskirkjunni og Liverpool Street lestarstöðinni.