Barnaníðingur handtekinn að nýju

Spænskur barnaníðingur er hlaut náðun að beiðni Jóhanns Karls Spánarkonungs var handtekinn í Murcia á Spáni í gær. Maðurinn, Daniel Galvan Vina, hafði verið látinn laus úr fangelsi á þriðjudag ásamt 48 öðrum Spánverjum sem setið höfðu í fangelsum í Marokkó.

Múhameð sjötti, konungur Marokkó, hafði náðað fangana að beiðni Spánarkonungs, sem hafði heimsótt landið í júlí. Mótmæli fóru fram fyrir utan þinghúsið í Rabat, höfuðborg Marokkó, á föstudag, en Vina var fundinn sekur árið 2011 fyrir að hafa níðst á ellefu börnum og hlaut þrjátíu ára fangelsisdóm fyrir.

Marokkósk stjórnvöld segja náðunina mistök og að konungurinn hefði aldrei veitt hana hefði hann verið meðvitaður um þá glæpi sem Vina framdi. Í kjölfar mótmælanna var fangelsisstjóra landsins sagt upp störfum og náðunin dregin til baka.

Fyrr á þessu ári söfnuðust mörg þúsund manns saman í Casablanca í þeim tilgangi að mótmæla ofbeldi gegn börnum, en nokkrir erlendir ríkisborgarar hafa verið handteknir í Marokkó fyrir barnaníð á undanförnum mánuðum.