Geta kveikt á samúðarrofanum

Siðleysingjar búa yfir hæfileika til að kveikja eða slökkva á samúð með öðru fólki. Þetta fullyrða vísindamenn í Hollandi, sem greina frá nýrri rannsókn í vísindatímaritinu Brain.

Þessar niðurstöður ganga þvert á það sem áður var talið. Siðleysingjar hafa verið taldir ófærir um að finna til samúðar og eiga því til að fremja hina hræðilegustu glæpi án minnstu samvisku.

Hollendingarnir segja rannsóknir sínar skýra hvernig siðleysingjar fara að því að vera heillandi í samskiptum þegar þeim hentar en samviskulausir með öllu þegar sá gállinn er á þeim.

Niðurstöður Hollendinganna vekja von um að þessum einstaklingum sé viðbjargandi. Hugsanlega sé hægt að kenna þeim að „kveikja á“ samúðinni þegar þurfa þykir í samskiptum við annað fólk.

Hollendingarnir gerðu tilraunir á 18 afbrotamönnum sem greindir hafa verið með siðleysi og 26 manna viðmiðunarhópi.