Egypski herinn hvetur til mótmæla

Yfirmaður egypska hersins hvetur fólk til að halda út á götur á föstudag til að mótmæla ofbeldi og styðja bæði herinn og nýju stjórnina, sem herinn kom til valda í byrjun júlí.

Abdel Fattah el Sisi herforingi, sem er í senn æðsti yfirmaður hersins, varnarmálaráðherra og aðstoðarforsætisráðherra, segir að fjölmenn mótmæli nú gefi stjórninni og hernum „umboð“ til að gera það sem þarf til að stöðva blóðsúthellingar, eins og hann orðaði það.

Þessi orð hans eru talin benda til þess að herinn búi sig nú undir aðgerðir. Átök milli stuðningsmanna og andstæðinga Múhameds Morsi hafa kostað á annan tug mannslífa í þessari viku.

Herinn steypti Morsi, sem var lýðræðislega kjörinn forseti á síðasta ári, af stóli í byrjun mánaðarins og hefur haldið honum föngnum síðan.