Cameron vill útrýma barnaklámi af netinu

Forsætisráðherra Bretlands, David Cameron, hefur hvatt netþjónustufyrirtæki til þess að vinna harðar að því að útrýma barnaklámi af veraldarvefnum. Cameron sagði jafnframt að hann mundi íhuga að herða lögin, bregðist fyrirtækin ekki við þessari beiðni.

„Sem stjórnmálamaður og foreldri hef ég áhyggjur af þessari þróun. Við eigum öll smá sök í því að segja að allt sé leyfilegt á veraldarvefnum og að það sé ekkert við því að gera. En það eiga að vera til lög um það sem birtist á vefnum,“ sagði Cameron í sjónvarpsviðtali á BBC á sunnudaginn.

Forsætisráðherrann sagði að leitarvélar eins og Google og Yahoo þyrftu að taka meiri ábyrgð á því efni sem finna má hjá leitarvélunum. „Það er mikilvægt að fyrirtæki af þessari stærðargráðu sýni samfélagslega ábyrgð,“ bætti Cameron enn fremur við.

Hann hrósaði þó netfyrirtækjunum fyrir að hafa lokað algjörlega á viss leitarorð á þráðlausu interneti til þess að koma í veg fyrir að börn gætu komist í gróft myndefni á stöðum eins og kaffihúsum og veitingastöðum.