Gengust bæði undir kynleiðréttingu

Arin Andrews og Katie Hill frá Tulsa í Oklahoma eru á yfirborðinu eins og hvert annað kærustupar. Bakgrunnur þeirra er hins vegar ansi áhugaverður þar sem Arin fæddist í líkama stúlku en Katie í líkama drengs.

Þau hafa nú bæði gengist undir kynleiðréttingu, en þau urðu ástfangin eftir að hafa kynnst í stuðningshópi transfólks.

„Ég hataði brjóstin mín,“ segir Andrews sem áður hét Emerald, en hann er sautján ára í dag. „Mér fannst alltaf eins og þau ættu ekki að vera þarna, en núna líður mér loksins vel í eigin líkama. Enginn veitir mér sérstaka athygli í sundi eða ræktinni. Ég get bara verið venjulegur karlmaður.“

Hill er tveimur árum eldri en kærastinn og varð fyrir miklu einelti í barnæsku. Hún bar nafnið Luke og glímdi við alvarlegt þunglyndi í nokkur ár áður en hún áttaði sig á því að hún væri kvenkyns.

Parið hefur notið stuðnings frá fjölskyldum sínum en aðra sögu er að segja af vinum og kunningjum.

„Ég missti einn af mínum bestu vinum í kynleiðréttingarferlinu,“ segir Arin og Katie tekur í sama streng. „Ég átti fullt af nánum vinum í skólanum, en allt í einu hættu þeir bara að tala við mig.“