Lestarstjórinn sætir rannsókn

Rannsókn yfirvalda á Spáni vegna lestarslyssins sem varð í gærkvöldi beinist nú að lestarstjóranum sem ók lestinni. Stefnt er að því að ljúka rannsókninni á sem skemmstum tíma. Lestarstjórinn, sem heitir Francisco Jose Garzon Amo, verður yfirheyrður í dag, fimmtudag. Spænskir fjölmiðlar greina frá því að lestin hafi verið á 190 kílómetra hraða á klukkustund en að á staðnum sé 80 kílómetra hámarkshraði. Myndband af atburðinum birtist á Vísi fyrr í dag. Óljóst er hvort að aðrir sæti einnig rannsókn. Lestarvagnarnir hafa verið fjarlægðir af teinunum með krana og sendir í greiningu. Frá þessu greinir á fréttavef BBC.

Forstjóri lestarfélagsins sem rak lestina, Julio Gomez Pomar, sagði í samtali við dagblaðið El Mundo að lestarstjórinn eigi 30 ára reynslu að baki hjá félaginu og að hann hafi keyrt leiðina í um ár. Sagði hann einnig að lestin sem um ræðir hafi farið í gegnum eftirlit að morgni slysdagsins og að hún hafi verið í fullkomnu ástandi.

Að minnsta kosti 80 manns létust í slysinu og 160 slösuðust, þar af 32 alvarlega. Aðkoman að slysstað var hræðileg að sögn sjónarvotta. „Ég er að koma frá helvíti,“ sagði slökkviliðsmaðurinn Jaime Tizon, einn af þeim fyrstu til þess að koma á staðinn í samtali við spænska blaðið ABC.

Þriggja daga þjóðarsorg var lýst yfir á Spáni í morgun og pílagrímshátíð sem stóð til að halda í borginni í dag var aflýst vegna slyssins.