Solberg og Jensen teknar við

Ný stjórn Hægri flokksins og Framfaraflokksins er tekin við í Noregi. Leiðtogar flokkanna, þær Erna Solberg og Siv Jensen, kynntu ráðherra stjórnarinnar í morgun.

„Allir þessir ráðherrar hafa lofað að gera sitt besta fyrir Noreg næstu fjögur árin og það munum við gera,“ sagði Solberg eftir að hún hafði lesið upp nöfnin á ráðherrunum, sem eru átján talsins.

Solberg, sem er leiðtogi Hægri flokksins, verður forsætisráðherra og Jensen, sem er leiðtogi Framfaraflokksins, verður fjármálaráðherra. Utanríkisráðherra er Børge Brende úr Hægri flokknum.

Kynjahlutföll nýju stjórnarinnar eru jöfn: níu konur og níu karlar eru ráðherrar. Hægri flokkurinn fær hins vegar 11 ráðherra en Framfaraflokkurinn sjö.

Stjórnin verður minnihlutastjórn en nýtur stuðnings tveggja annarra hægri flokka: Venstre og Kristilega þjóðarflokksins.

Fyrr í gærmorgun hafði Jens Stoltenberg beðist lausnar fyrir fráfarandi ríkisstjórn sína.